了解我多D

Esther（she/her）係一位喺澳洲執業嘅 ACA 二級認證輔導員，提供網上輔導，並特別支援講廣東話嘅人士。呢個空間係俾你去停低，睇翻你真正既需要同埋更有力氣向前行嘅方法。

我嘅輔導風格溫柔而踏實，以了解你為重點——唔催促你、唔批判你，陪你一步一步慢慢行。

Esther 嘅專業實務建立於 QUT 健康診所一年的臨床實習，以及持續喺 Lifeline 做危機支援服務。呢啲經驗令佢有好多機會喺強烈情緒面前保持穩定陪伴，亦見證到當一個人真正被聽見時，嗰種力量有幾大。

喺呢度，輔導唔係要畀你「建議」或者話你應該點做。更似係有一個人坐喺你身邊，陪你一齊整理嗰啲覺得好重、好卡住嘅嘢——好好咁聽你講，令你可以更清楚聽見自己嘅內心，同時用你自己嘅節奏慢慢向前行。

我走入輔導呢條路，係由香港嘅課室開始。做中學老師嗰陣，我親眼見到情緒同心理需要好容易喺追求成績嘅過程入面被擺埋一邊。我慢慢明白到，我哋面對嘅壓力——由家庭系統到社會期待——唔會因為大個咗就消失；佢哋只係換咗個樣，繼續跟住我哋。

久而久之，我愈嚟愈想做嘅唔係「督促」同「推你向前」，因為我支持人嘅目的唔係為左學業成就，而係全人發展。亦正正係呢個由「表現」轉向「同行」嘅轉變，帶我嚟到而家做嘅呢份工作。

情緒落喺自己嘅第一語言入面，感覺都會唔同。以廣東話為主嘅輔導，可以減少你喺脆弱時仲要「翻譯自己」嗰種疲累，令呢個空間更加即時、貼切同安全。

如果你正考慮搵支援，但未太肯定可以由邊度開始，你可以先預約一個免費30分鐘簡談。

呢個係一個無壓力嘅空間，俾我哋互相認識。你可以問任何問題，亦可以感受下我會唔會係一個適合你嘅輔導員。